PASAMBAHAN SIRIAH


Ditulis Kembali Oleh : I. St. Sinaro

PANGKA
Iyo kabakeh Sutan juo sambah dipohonkan.-

ALEK
Manitahlah….

PANGKA
Sungguahpun iyo kabakeh Sutan dipohonkan sambah jo panitahan, nak sarapeknyolah Angku Pangulu nan gadang basa-batuah, karapatan dunsanak jo sudaro, ipa dengan bisan, ahli nan saisi rumah-gadang nangko.—-
Sakali ambo mandatangkan sambah, indak kadiatok dibilang gala, hanyo kapa-tok pambilang gala, jo ma’af sajo dimuliakan …. Sapihak sambah jo panitahan diparirikkan kahadapan silang nan bapangka karajo nan bapokok, ujuang panitahan kahadapan Sutan.-

ALEK
Yoooooolah ….

PANGKA
Adat kato nan kadipasambahkan: Talatak putiang diulu, dibawah kumpalan tali, samulo kato nan dahulu, tigo limbago nan tajadi.- Manolah tigo nan tajadi, partamu sambah manyambah, kaduo baso jo basi. Katigo siriah jo pinang.- Sambah manyambah dalam adat, tali batali undang-undang, tasabuik jo muluik manih, tapakai jo baso baiak. – Muluik manih calempong kato, baso baiak gulo dibibia, didalam cupak nan piawai, banamo adat sopan santun.—
Adat dilawik bajuru-mudi, adat disabuang bajuaro, adat dialek barajo janang.- Kok dikaji tantang juru mudi, tau di angin nan basiru, tau diombak nan basabuang, tau dipasang turun naiak. – Kok dikaji tantang si-juaro, tau dituah sisiak ayam, tau dibulang nan bakicuah, pandai managah manampin taruah.- Kok dikaji tantang sirajo janang, tau diereng dengan gendeng, tau dicakak dengan baik, manjago labiah dengan kurang. —- Ba-a sakarang iko kini :

Ramo-ramo tabang malayang
Malayok kakoto tangah
Banyaknyo ampek puluah ampek
Endah carano bukan kapalang
Talatak ditangah tangah
Dilingkungan urang nan rapek
Buruang sinurak buruang nuri
Siculiak ateh pamatang
Siriah galak pinang maanari
Mancaliak alek nan lah datang

Lorong kapado caranonyo, carano Banja Renoali, buatan tukan Kotogadang.- Nan rimbun bungo kalikih, nan ranggah bungo kacubuang, nan kungkun gagak kainggok, nan lantiak alang bamain.- Sataun dipanggang Bugih, samumsim dilingka Cino, usahkan ratak, rangehpun tido.—
Pihak kapado songkok carano; dalamak urang namokan : Tanun banamo silang suto, baukia bubungo rampai, baturap jo banang ameh, balukih bak kaluak paku, ragi nan samo baliak –balah. – Baratuih camin dipinggia, batabua kaco ditangah, kileek kumilek cahanyonyo, sarupo bintang ateh langik, bintang kujarah bakuliliang.—-
Pihak kapado sisiriahnyo, siriah udang tampa hari; tampuaknyobak buku balam, gagangnyo bagai suaso, buah diambiak katinaman, batang diambika katiruan, sataun dalam guluangan, usahkan masiak layua tido, malah batambah mudo juo, –konon pulo pinangnyo, pinang sierak-ero manih, tumbuahnyo dikida rumah, tingginyo panjek-panjekan, randahnyo jangkau-jangkauan, pucuak malepai awan putiah, sataun tupai dek mamanjek, jarang basuo jo buahnyo.—
Salorong kapado digambianyo, gambia kuniang sarupo dadiah, buatan puti Sarilamak, manihnyo tingga dilidah, kaleknyo tingga dirankuangan, daun malayok kalautan, tibo dipulau batebaran. —- Kok kunun pulo disadahnyo, sadah putiah ambun bajano, dibasuah jo aiya bungo, dipati jo pati santan, dikipeh jo ambai-ambai. – Dipalik jo jari manih, bakisa kajari tunjuak, mambayang katapak tangan, sapalik sapuluah ameh, sakadam sakati limo. – Harago nan tidak taragoi, harago satimbang jo nagari, makanan anak rajo-rajo, pamenan bibia puti-puti. —- Pihak kapado timbakaunyo, timbakau aluih ambun bajelo, bijonyo datang dari Ruhum, pakirin dayang dilautan, diabo anak Sutan Bantan, diracik anak garagasi.- Saheto panjang jaluanyo, bajamua dibiliak dalam, bapantang masiak dek paneh, masiak dek ambun tangah malam.

Tanam siriah tanamlah udang
Tanam karakok dihalaman
Cabiak siriah gatoklah pinang
Guuluanglah rokok pamenan tangan
Mudiakkan sawah dialai
Hiliakan sawah taruko
Kok banyak siriah dibalai
Sado iko dalam carano

Ayam putiah tabang batali
Dilurah mangko maraok
Batalua dirumpun sariak
Anaknyo turun salapan
Makanlah siriah pinang kami
Bapapatah mangko disingkok
Baibarat mangko dicabiak
Sapahnyo bari bajunjuangan

Sakianlah sambah ditibokan, kahadapan Niniak dengan Mamak, sarato alek tangah rumah, alamat titah ka St. Parpatiah.—

ALEK
Alah sampai dek St. Sinaro ?.-

PANGKA
Dibilang alah ….

ALEK
Ruponyo sapanjang buah panitahan Sutan, nan tatabua kenan banyak, nan talayang katangah-tangah, tatumpah kapado ambo;
Kalau didangalah baiak Bunyi, dipandang lah rancak rupo.- lah bunta sawah nan sapiriang, lah masak sando padinyo.-
Tapi samantangpun baitu, dek padi bukan satangkai, dek pipik bukan saiku.- Dek padi bukan satangkai, masak indak sakali ambiak, dek pipik bukan saikua, tabang indak sakali inggok, apolah sabab dek baitu : karano kami lai baduo batigo dihadapan niniak jo mamak, sarato imam dengan khatib, cukuik jo alek nan banyaakko.- Mako ka-ambo cubo marantang panjang, untuang taserak jalo suto; kok untuang ikan nan kabuliah, kok indak am eh tantangannyo…. Sakironyo ambo bao bakato baiyo bajalan bamulah, laikoh adat nan baitu, laikoh pusako nan bak kian, nak bapambarian St. tantang itu….

PANGKA
Lah banamo sampai dek St. Maruhun?.-

ALEK
Sakiro alah ….

PANGKA
Tapi tantangan sambah-manyambah, randah nan dianjuang tinggi, ketek nan diamba gadang, jo maaf dimintak parundingan dikumbalikan kapado Sutan?…

ALEK
Manitah Sutan ….

PANGKA
Ruponyo parundingan nan kadikumbalikan kabakeh Sutan; nan manjadi kabanaran dek sutan madok kabadan diri ambo: Dek karano kami lai baduo jo batigo, dihadapan ado Niniak Mamak, sarato alek nan banyakko, nank cubo mampaiyo-patidokan, ditantangan kato nan kamanjawab, ditantangan gayuang nan kamanyambuik, lai koh adat nan baitu, lai koh pasa nan bak kian, kan baitu kato Sutan tadi ???….

ALEK
Iyo bana….

PANGKA
Yo baitu biaso nan bapakai, alah digarih makan paek.-
Dapek surang dibuleti, dapek baduo-batigo dipaiyokan.- Baa-tonyo lai kini, asa dapek surang dibuleti, dapek baduo batigo dipaiyokan, lah rancak bana nan baitu Sutan.-

ALEK
Sampai dek St. Sinaro ?.

PANGKA
Sampai ….

ALEK
Dek ambo muluik sapatah itu bana nan ambo nanti Stan, rundiang sabuah-tu nan ambo tunggu.— Baa-tu nyo lai : Uumpamolah gugua dari tampuak, umpamolah sakah dari dahan, Insya Allah ambo paiyokan, lai kasaba Sutan Mananti ?.-

PANGKA
Jo saba hati Sutan ….

ALEK
Nan parundiangan kito kini ?.-

PANGKA
Dibateh ….

ST. MARUHUN
Imam Sinaro ?.-

Imam Sinaro
Manitahlaah…

ST. MARUHUN
Dek awa kato nan sapatah, salam tajelo ka nan rapek, kato tatabua dinan banyak, jo parsambahan Mamak ambo jalang.- Ujuiknyo sambah nan tatimpo pada mamak, nyato tawalak di ukuran, tabayang barih dibalabeh, bana bak andai kato bida :

Dek curiang barih dahulu
Diawa kato nan sapatah
Sambah tibo dialek jamu
Nan datang dari pihak sipangka.-

Ba-a tu nyo lai kini : Karano sasuai juo bak undang kato Mamak: Babiduak kan iyo banangkodoh, kok bajalan banantuo.- Mako taradok sambah jo titah dari sapangka kpd alek ambo tatiangkan kanan tuo, kato bajawab, gayuang manyambuik kadari Mamak tarabiknyo…. Sakitu sambah Mak ?…..

ALEK
A-yo maa-nyo St.Sinaro ?…. Sambah tibo pado Su tan.-

PANGKA
Mani tahlah….

PANGKA
Jo kabanaran Sutan ambo jalang, tapi sungguahh jo kabanaran, rila
Rila jo maaf dipohonkan. —- Adopun antaro ambo jo Sutan cako, panek nak jadi parantian, patang nak jadi pamalaman, iyo disatantang bakato baiyo, bamulah. —- ulunyo lah ambo mudiak-I, muaronyo lah ambo iliri, ditapak sapanjang alua. Tagah dek patuah kanan tuo sutan, nan tuo patuah ka Pangulu, ruponyo satantangan kato kabajawab, gayuang, kamanyambuik, tatumpah juo kadiri ambo.—-
Tapi sawajah dari pado itu, saketek nan marusuah nan manggamang diambo kiniko sutan.- Kalao nan sa-andaknyo, kan iyo sabanyak tanyo sabanyak jawab, sabanyak gayuang sebanyak sambuik.- Baa tu nyo kini, kok indak taulang bak manyapuah ndak tabaliak bak mamanggang, kaba-a ko lah???-A-iko ambo pulangkan ka Sutan.-

PANGKA
Lah banamo sampai dek St. Maruhun?.-

ALEK
Sakiro alah ….

PANGKA
Ruponyo nan manjadi buah panitahan dek Sutan mahadok kaateh badan diri ambo, iyo malah jikok bak diateh andaknyo, diukuran nan sampai, dibilangan nan cukuik, iyo sabanyak gayuang sabanyak sambuik, sabanyak kato sabanyak jawab.- Baa-tu-nyo kini, kok indak taulang bak manyapuah, kok indak tabaliak bak mamanggang, kabaa-kolah, kan baitu Sutan?

ALEK
Yooooolah ….

PANGKA
Diambo kaji nan marusuah nan manggamang, iyo kaji nan saganok itu; gauyuang kok indak disambuik, kato kok indak dijawab…. Baa satantang itu, asa kan kato lai kabajawab, kadisambuik, indak kadiuji samo merah, indak kadikati samo barek.- Panjang jo singkek pado Allah disarahkan.—

ALEK
Alhamdulillah kajaweknyo Sutan… Ambo sangko taditu: Kok kabalari samo kancang, baramuak samo dalam.- Ndak doh lai : Diateh kami alek, sebagai tagak nan bapusu, duduak nan baropok, nak ambo baiyakan amanah nan bapagang, nak ambo lansaikan utang tapabuek….

Sairing balam jo barabah
Balam tabang barabah mandi
Sairiang salam dengan sambah
Salam datang sambah kumbali
Kumbali juo kapado Sutan

Yoo, maa-nyo St, Sinaro???….

Anak ayam pandai baranang
Dapek kakinyo dek buayo
Duduaklah Sutan jo batanang
Ambo kamulai jo bicaro

Adopun satantang buah panitahan Sutan cako: Taserak nak ambo piliah, dipiliah lalu dikampuangkan; kok anyuik nak ambo sonsong, disonsong lalu kaulunyo, apolah jinih panitahan sutan tadi : “Dek carano alah katangah, sarek barisi kalangkapan, mako jokok maliyek diateh rupo, basiang di ateh tumbuah, tumbuah sarupo iko kini: Siriah sacabiak mintak dikunyah, pinang sagaiyang mintak digatok, dipipia gambia dipalik sadah, dek kami alek nan datang, kan iyo baitu bana kasaiyahnyo Sutan ??? …..

PANGKA
Yoooooolah….

ALEK
Takilek camin diudaro
Jatuah kalawik batu karang
Hilang disemba ikan iyu
Dek bana sambah nan tibo
Laiyanyo kapado ambo surang
Batin kaado alek jamu

Kato warih kato bajawek, kato pusako kabatolong, manuruik papatah jo patitih, basuo pamenan adat :

Baatanun kulindan suto
Sajalan ragi jo banang
Timpo batim po salam tibo
Batanun kulindan suto
Sajalan ragi jo banang
Suri dimano talataknyo
Layang malayang sambah tibo
Timpo-batimpo sambah datang
Titah ka-ambo tahantaknyo

Kato tapegang dek Pangulu, rundiang tasimpan dinan rapek, awa jo akia kok sapakai, laiya jo batin kok sasuai.- Pihak jok kato kamanjawab, iyo jo gayuang kamanyambuik, tapek di ambo tarabiknyo.—– Sungguah diambo tarabiknyo, nyato adat barati tumbuah, nyato pusako bainggiran,- Bacupak talago panuah, Bagantangan simahar jolelo, undang-undang maisi kandak.- Karano sabab nan baitu, kato iyo kato-baturuik, kato indak kato mati, kato antah kato tatagun, luwiakato umum kato suhabat kato mambunuah, usah basuo nan bak kian.- Mako digilinglah kato jo mupakaik, dikaka rundiang jo nan patuik, dapeklah kato sabulek, nan buleknyo indak bapasagi, kini lah buliah digolongkan.- kok picaknyo indak basuduik, picaklah dapek dilayangkan.—-
Tibo kami dipabasokan, basapu laman nan sabidang, takuwak pintu bakeh lalu, tabantang lapiak paradani; talatak siriah dicarano, tando alamat putiah hati… Sananglah bana dalam hati Sutan: Baa-lah bana sanang hati, dek malin indak tabacokan, dek tukang alun talukihkan, Allah lah sajo nan ka-tau.—- Nak bak sakarang iko kini : Pihak dek kami alek Sutan, alah lah saujo lah salapeh, satanai salatakkan, salalah sakaja untuak manarimo siriah Sutan…. Tapi samantangpun baitu Sutan : Adopun masak siriah-ko 3 parakaro: Partamu masak digagang, kaduo masak dimakan, katigo masak jo mupakaik…. Nan dikatokan masak digagang: Rononya kuniang mangarisiak, tampuak layua daunlah kucuik, dek ulek indak talamakkan, dek samuik haram manjalari.- Nyampang gugua menjalang tanah, jan dicito kajunjuang lai, tampan kajadi sorak sajo, dalea nan sakah siriah masak.— Tasabuik masak dimakan: Sadang tangkai lai bagatah, maso daun lai baminyak, gilo dikijo pinang mudo, dirayu sadah jo gambia, bararak lalu kacarano.- Diupam manjadi satu, dikunyah bamerah bibia, kaleknyo ditingga dirakuangan, sarinyo naiak kaparoman.-
Kok dikatokan masak jo mupakaik: Alun dicaliak lah tapandang, lah jaleh bangun rawiknyo.- Alun dikicok lah taraso, la nyato lamak manihnyo:—-St, Sinaro???.-

PANGKA
Taruihkan Sutan….

ALEK
Salorong siriah Suriah nan katangah, nyato bukan masak di-gagang…. Tapi indak pulo kadimasakkan bamerah bibia.—- Izin jo rila dari sutan, siriah kamasak jo mupakaik:

Alun bakililleklah bakalam
Bulan lah sangkap tigo puluah
Alun diliyeklah dimakan
Raso lah tibo dalam tubuah

Sakian sambah dipuhunkan

PANGKA
Lah sampai dek Sutan Maruhun?….

ALEK
Sampai …..

PANGKA
Sapanjang parundiangan Sutan tadi, kok siriah kami alah batarimo, ditarimo bukan dimakan, dimaakan sajo jo mupakaik : “Alun diliyek lah bamakan, raso lah tibo dalam tubua”…. Kan iyo baitu tadi sutan ???.-

ALEK
Sabananyo…..

PANGKA
Urek sinyali-nyali rateh
Pucuak suruan mudo-mudo
Dilangik Sutan lalu-linteh
Ambo dibaliak itu pulo

Alhamdulillah, kok kandak iyo-lah buliah, namun pitak indak balaku.- Sanang lai saleso tido, tatungkai indak tarabahkan, lah rabah indak tadabiah…. Walau samantangpun nan bak itu, biya panuahnyo panuah kabawah, ambo lapehkan Sutan dari utang.— Hanyo kaganti pamujuak-mujuak tangih, tagamang kok raso kabajawek, tolong tarimo tanyo kami:

ALEK
Sutan Sinaro ?….

PANGKA
Lalu Sutan

ALEK
Ahamdulillah pado Allah, puji jo sanjuang pado Sutan.- dek maaf gadang paidah, dek rila gadang munpaat, lapehlah kami dari utang, siriahlah masak jo mupakaik.-
Adopun kamudian dari pado itu, lah tibo pulo sudi jo siasek sarato tanyo jo da-awa dari Sutan, apolah jinih bunyinyo:
Kok siriah dimakan jo mupakaik, sapahnyo
Kama Sutan buang, Aiyanyo kama diludahkan,
Kan iyo baitu kasaiyahnyo Sutan ???…
PANGKA
Yoooolah….

ALEK
Panggia bakandak turuik, Sutan;
kok imbau bakandak jalang, tanyo tantu bakandak jawab…. Kajawabnyo pulo dari ambo:

Anam koto babalai akaik
Urang manjua cawan pinggan
Langang kutiko hari hujan
Siriah dimakan jo mupakaik
Sapah dibuang jo rundiangan
Aiyanyo ditampuang karilahan
Sakian jawab dari ambo.-

PANGKA
Ba-a satantang siriah-manyiriah, lah patuik kito tuhuakan?

ALEK
Kito tuhuakan sampai siko.-

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s