Pantun

Barundiang
ALUA DI RUMAH DUKA

Sialek/Tamu:
Manyambah kito ka pado Allah,
basalawat kito ka pado nabi
kato sajo nan dipakatokan.
A lah nan manjadi buah kato cupak panuah bilangan cukuik,
nan punyo datang manjapuik,
lah bapulang baliau ka rahmatullah.
Baa dikitonan bakarik bakabiah,
baipa babisan,
sarato buek arek satia nan taguah,
jauahno lah bajalang ampiang lah baturuik,
kok rusuahno lah bapujuak,
tangihno lah baantok-an,
pun baitu no lai dikami nan satampuah lalu
sabondong suruik basuo manuruik undang
jauah bajalan banyak nan tampak,
lamo iduik banyak dirasai,
Allah ta’ala bersifat qadim,
manusia bersifat khilaf,
kok tajadi khilaf jo khilafat,
salah nan indak disingajo,
kirah muluik ko manyingguang,
tagisia kanaik talintuang katurun
yo nak dimintakan rila jo mauh ka ahli waris.
Sakian bana dianta anta sampai bakeh sutan

Pangka:

Pitaruah nan dahulu,
wasiat untuak nan tingga,
sagalo kaum muslimin dan kaum muslimat
alah babari rila jo mauh kato baliau,
iko lah namo kabari no sutan.
Si pangka balik minta maaf
Dahulu kato basitinah,
kudian kato basicapek,
capek antanyo bakeh sutan,
a lah kacapekno maagai parundingan kito cako
bajalan baranti bakato sudah,
kauk abih biang no cabiak,
tumbuah pulo nan bak banyiah,
tabik pulo nan bak padi,
di kami disilang nan bapangka
karajo nan bapokok,
dialang nan bajawek,
tabang nan batimbalan,
bunyi nak samo didanga.

Si alek:

Sajak salangkah dari rumah lah manjadi niak jo nasa
mambari rila jo mauh ka baliau.

Si alek mintak turun
Dikami nan satampuah lalu sabondong suruik
tumbuah sawajah iko kini tantu balaia sampai ka pulau,
bajalan sampai kabateh,
duduak nak bakisa duduak,
tagak nak bakisa tagak,
duduak nak baiyo,
tagak nak bamuah jo silang nan bapangka.

Si pangka:
Pintak buliah kandak balaku,
lah kabalapeh jo muka nan janiah hati nan suci.
–==##==–

PANTUN
Kalalawa dipulau Rimbang
Anak ruso mati tasabiah
Kok gawa mintak ditimbang
Kok doso ampun nan labiah

Bukan tambilang mangulampai
Tambilang panggali pakuburan
Bukan mambilang tando pandai
Mambilang untuak dipasambahkan

Jikok dikambang saleba alam
Jikok dibalun sabalun kuku
Tantang nangko basudah kalam
Tambo sakiro itu dulu

Tungkek galah Amat Dirajo
Sitaba dibaliiak pakan
Kalau salah tobatlah ambo
Kok bana samo amalkan

Kaluak paku kacang balimbiang
Tampurung lenggang lenggangkan
Baok manurun ka saruaso
Tanamlah siriah jo gagangnya

Anak dipangku kemanakan dibimbiang
Urang Kampuang dipatenggangkan
Tenggang nagari jan binaso
Tenggang sarato jo adatnyo

Panakiak pisau siraut
Panungkek batang lintabuang
Salodang ambiak ka niru
Satitik jadikan lauik
Sakapa jadikan gunuang
Alam takambang jadikan guru

Karata madang du ulu
Babuah babungo balun
Marantau bujang dahulu
Di rumah pangguno balun

Kok bujang pai ka danau
Iyu bali balanak bali
Ikan panjang bali daulu
Kalau bujang pai marantau
Ibu cari dunsanak cari
Induak samang cari dahulu

3 responses to “Pantun

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s